Kosova nuk do t’i detyrojë serbët në veri që të integrohen, por do të synojë t’i nxitë që të bëhen pjesë e shtetit përmes stimuleve dhe investimeve- ka thënë kryeministri Hashim Thaçi.
“Nuk do të ketë dhunë apo veprime të njëanshme, por vetëm dialog dhe bashkëpunim. Gjithçka do të koordinohet me bashkësinë ndërkombëtare, NATO-n dhe institucionet tjera ekonomike”, ka thënë kreu i ekzekutivit kosovar për agjencinë Reuters.
Ai gjithashtu e ka mirëpritur thirrjen e djeshme të përfaqësuesit të BE-së, Piter Feith, për të hequr zyrtarët e korruptuar nga pozitat e larta të qeverisë së Kosovës.
“Është një sëmundje që e kemi trashëguar. Nuk do të ketë kompromise, kudo që ka korrupsion, ai do të luftohet”, ka thënë Thaçi.
